काठमाडौँ / रिडी पावर कम्पनी लिमिटेडले अर्को वर्ष राम्रो डिजिटमा सेयरधनीलाई लाभांश दिने प्रतिबद्धतासहित साधारण सभा सम्पन्न गरेको छ । पुस २८ अर्थात शनिबार इन्द्रेणी कम्प्लेक्स नयाँ बानेश्वरमामा सम्पन्न २२औँ वार्षिक साधारणसभालाई सम्बोधन गर्दै कम्पनीका अध्यक्ष संजिव न्यौपानेले यस्तो बताएका हुन् ।  

कम्पनीका अध्यक्ष संजिव न्यौपानेको अध्यक्षतामा सम्पन्न साधारणसभाले आर्थिक वर्ष २०७९/८० को संचालक समितिको प्रतिवेदनमाथि छलफल गरी पारित गरेको छ । 

त्यसै गरी सभाले लेखा परिक्षण प्रतिवेदन सहितको असार ३१, २०८० को वासलात, नाफा नोक्सान हिसाब तथा नगद प्रवाह  विवरण लगायत वित्तिय विवरणहरुमाथि छलफल गरी पारित गर्नुको साथै आर्थिक वर्ष २०८०/८१ को लागि लेखा परीक्षकको नियुक्ति  गर्नुको साथै निजको पारिश्रमिक निर्धारण गरिएको छ । कम्पनीको मातहतमा अहिले ४ वटा आयोजनाहरू सञ्चालनमा रहेका छन् । 

कम्पनीको पहिलो जलविद्युत आयोजना धादिङ्ग  जिल्लाको थाक्रे गाउँपालिकामा ५ सय किलोवाट क्षमताको रैराङ खोला जलविद्युत आयोजना २०६१ सालदेखि सञ्चालनमा छ भने दोस्रो आयोजना रीडी खोलामा २४०० किलोवाट क्षमताको रीडीखोला जलविद्युत आयोजनाको निर्माण २०६६ सालमा सम्पन्न गरी राष्ट्रिय ग्रिड प्रणालीमा विद्युत आपूर्ति गरिरहेको छ ।

त्यसैगरी, कम्पनीको तेस्रो आयोजना पाँचथर र ताप्लेजुङ  जिल्लाहरूको सीमाना भएर बहने इवा खोलामा ९९०० किलोवाट क्षमताको इवाखोला जलविद्युत आयोजनाको निर्माण पूरा भई २०७६ साल आश्विन २० गतेबाट व्यवसायिक उत्पादन गरी राष्ट्रिय ग्रीड प्रणालीमा विद्युत आपूर्ति गरिरहेको छ ।

त्यसैगरी, कम्पनीको चौथो आयोजनाको रूपमा लुम्बिनी प्रदेश, रुपन्देही जिल्लाको तिलोत्तमा नगरपालिकामा ८५०० किलोवाटको बुटवल ग्रिड जडित सौर्य विद्युत आयोजनाको निर्माण गरी २०७७ साल कार्तिक १५ गतेदेखि निरन्तर रुपमा व्यवसायिक उत्पादन गर्दै आईरहेको छ। 

यसरी सम्पूर्ण आयोजना गरी कम्पनीको मातहतमा कला कुल २१.३१ मेगावाटका विद्युत आयोजनाहरू सञ्चालनमा रहेका छन् । रिडी पावर कम्पनीको लगानी रहेको साझा पावर डेभलपमेन्ट प्राइभेट लिमिटेडले अहिले २० मेगावाट क्षमताको तल्लो बलेफी खोला जलविद्युत आयोजना निर्माण गरिरहेको छ । 

सो आयोजनामा कुमारी बैङ्कको मुख्य लगानी रहेको छ । यस आयोजनामा लगानीकर्तालाई संस्थापक सेयरमा लगानी गर्ने अवसर दिइरहेको कम्पनीले जनाएको छ ।