महाराष्ट्रको जलगाउँमा बुधबार दिउँसो ४ः४२ बजे एउटा ठूलो रेल दुर्घटना भयो। पाचोरा स्टेशन नजिकै, महेजी र पार्धाडे बीचको पुष्पक एक्सप्रेसमा आगलागी भएको हल्ला फैलियो। यसै क्रममा एक यात्रुले चेन तान्यो। रेल रोकियो र डराएका यात्रुहरू बाहिर हाम फाले।

यसैबीच, अर्को ट्र्याकमा आउँदै गरेको कर्नाटक एक्सप्रेसले धेरै यात्रुहरूलाई किच्यो । जलगाउँका एसपीले ११ जनाको मृत्यु भएको पुष्टि गरेका छन्। 

विशेष प्रहरी महानिरीक्षक दत्तात्रय करालेले भने १२ वटा शव सिभिल अस्पताल पठाइएको पीटीआईलाई जानकारी दिएका छन्। ४० जना यात्रु घाइते भएको बताइएको छ। 

सेन्ट्रल रेलवेको भुसावल डिभिजनका आधिकारिक स्रोतले घटना भएको ठाउँमा तीव्र मोड भएको बताएका छन्। जसका कारण अर्को ट्रयाकमा बसेका यात्रुहरूले रेल आएको थाहा पाउन सकेनन्। 

यही कारणले गर्दा ठूलो संख्यामा मानिसहरू कर्नाटक एक्सप्रेसले किच्यो । सेन्ट्रल रेलवेका सीपीआरओ स्वप्निल नीलाका अनुसार घटनास्थल मुम्बईबाट ४०० किलोमिटर टाढा छ।

जलगाउँको सरकारी अस्पतालमा १२ वटा शव ल्याइएको छ। यी मध्ये ७ जनाको पहिचान भइसकेको छ। मृत्यु हुनेमा ९ पुरुष र ३ महिला छन्। पहिचान गरिएका ७ मध्ये ३ जना नेपालको भएको बताइएको छ । 

नन्दराम विश्वकर्मा (उमेर लगभग ११ वर्ष, नेपाल)

लच्छी राम पासी (लगभग २३ वर्ष, नेपाल)

कमला नवीन भण्डारी (४३ वर्षीया, नेपाल)

जावकला बुट्टे जयगडी (उमेर ५०)

नसिरुद्दीन बद्रुद्दीन सिद्दीकी (उमेर लगभग २० वर्ष, गोंडा)

इम्तियाज अली (उमेर ३५ वर्ष, गुलरिहा उत्तर प्रदेश)

बाबु खान (लगभग ३० वर्ष)

...रेलको पाङ्ग्राबाट धुवाँ निस्कियो

रेल नम्बर १२६२७ कर्नाटक एक्सप्रेस बेंगलुरुबाट नयाँ दिल्ली जाँदै थियो। जबकि पुष्पक एक्सप्रेस (१२५३३) लखनऊबाट मुम्बई जाँदै थियो। 

एक वरिष्ठ रेलवे अधिकारीले दिएको प्रारम्भिक जानकारी अनुसार पुष्पक एक्सप्रेसको एक कोचभित्र ‘हट एक्सल’ वा ‘ब्रेक(बाइन्डिङ’ को कारणले गर्दा झिल्काहरू उत्पन्न भएको थियो र केही यात्रुहरू आत्तिए। पुष्पक एक्सप्रेसको बोगी बी(४ को पाङ्ग्राबाट धुवाँ निस्किरहेको देखिएपछि उनीहरूले सिक्री ताने र  तल हाम फाले।

उत्तर पूर्वी रेलवे लखनऊ डिभिजनल रेलवे प्रबन्धक आदित्य कुमारले जलगाउँ रेल दुर्घटनामा हेल्पलाइन नम्बर जारी गरेका जानकारी दिए । उनले भने, “लखनऊ जंक्शनमा आपतकालीन बुथ छ, मानिसहरूले त्यहाँबाट पनि जानकारी लिन सक्छन्। अफवाह कसले फैलायो र कस्तो प्रकारको अफवाह थियो भन्ने कुरा अनुसन्धान पछि मात्र थाहा हुनेछ।” 

मुख्यमन्त्री देवेन्द्र फडणवीसले रेल दुर्घटनामा मृत्यु भएकाहरूका परिवारलाई ५ लाख रुपैयाँ क्षतिपूर्ति दिने घोषणा गरेका छन्। साथै, रेलवेले मृतकका परिवारलाई १.५ लाख रुपैयाँ, गम्भीर घाइतेलाई ५० हजार रुपैयाँ र घाइतेलाई ५ हजार रुपैयाँ आर्थिक सहयोगको घोषणा गरेको छ।