वासिङ्टन डिसी / अमेरिकामा राष्ट्रपतिमा निर्वाचित भएका डोनाल्ड ट्रम्पले ब्रूक रोलिन्सलाई कृषि मन्त्री नियुक्त गरेका छन् । आफ्नो मन्त्रीमन्डललाई पूर्ण बनाउँदै उनले लामो समयदेखिकी आफ्नी सहयोगी रोलिन्सलाई कृषि मन्त्री नियुक्त गरेका हुन् ।
शनिबार मध्याह्न अबेरतिर उनले यो घोषणा गरेका हुन् । कृषि मन्त्रालयको जिम्मेवारी दिन उनले बौद्धिक समूह अमेरिका फर्ष्ट पोसिली इन्ष्टिच्युटकी प्रमुखलाई रोजेका छन् ।
देशको सच्चा मेरुदण्ड अमेरिकी कृषकहरूलाई जोगाउने प्रयासको कमान्ड ब्रूकले आफ्नो हातमा लिने एउटा विज्ञप्तिमा ट्रम्पले भनेका छन् । योसँगै ट्रम्पको मन्त्रिमण्डल पूरा भएको छ ।
को हुन् रोलिन्स ?
कयौँ वर्षदेखि रोलिन्स ट्रम्पकी शीर्ष सहयोगी हुन् । उनी ट्रम्पको पहिलो कार्यकालमा ह्वाइट हाउसमा ट्रम्पकी पूर्व सहयोगी समेत रहिसकेकी छिन् । उनले अफिस फर अमेरिकन इनोभेशनको निर्देशक र डोमेष्टिक पोसिली काउन्सिलमा कार्यकारी निर्देशकको रूपमा समेत काम गरेकी छिन् ।
उनको मनोनयनलाई सिनेटले पारित गर्यो भने रोलिन्सले कृषि क्षेत्रलाई दिइने सहुलियत, संघीय पोषण कार्यक्रम, मासु निरीक्षण एवम् कृषि, खाद्य र वन उद्योगका अन्य पक्षहरू हेर्नेछिन् ।
उनले अमेरिका, क्यानडा र मेक्सिकोबिचको व्यापार वार्तामा पुनः छलफलमा पनि मुख्य भूमिका निर्वाह गर्नेछिन् ।
.gif)
