सिओल / दक्षिण कोरियामा भएको विमान दुर्घटनामा हालसम्म १ सय २४ जनाको शव फेला परेको छ । बीबीसीमा प्रकाशित समाचारअनुसार यसमध्ये ५४ जना पुरुष र ५७ जना महिला रहेका छन् ।
१३ जनाको शवको पहिचान खुल्न सकेको छैन । विमानबाट दुई जनालाई जीवितै उद्धार गरिएको छ । दुवै विमानको चालक दलका सदस्य रहेका छन् ।
उद्धार कार्यमा १ हजार ५६२ जना खटिएका छन् । जसमा वारुण यन्त्रका ४९० जना तथा ४५५ जना प्रहरी अधिकारी रहेका छन् ।
आइतबार बिहान थाइल्याण्डको बैंककबाट उडान भरेको जेजु एयरको बोइङ ७३७–८०० विमान दक्षिण कोरियाको मुआन विमानस्थलमा अवतरणका क्रममा दुर्घटना भएको थियो ।
सामाजिक सञ्जालमा साझा गरिएका भिडियोमा विमान रनवेमा चिप्लिँदै भित्तामा ठोक्किन पुगेको थियो । विमान ठोक्किएसँगै विमानमा आगो लागेको थियो । दुर्घटना स्थानीय समय ९ः०७ मा भएको थियो।
अवतरण्को क्रममा ल्यान्डिङ गियरमा समस्या आउदा दुर्घटना भएको समाचार एजेन्सीहरूले उल्लेख गरेका छन् ।
पाङ्ग्रा खुल्न नसक्दा विमानको सिधैँ रनवेमा ठोक्किन्छ । यसै क्रममा विमान धावनमार्गमा चिप्लिएर विमानस्थलको बाउन्ड्री पर्खालमा ठोक्किएको थियो ।
विमान ठोक्किने बित्तिकै ठूलो विस्फोट भयो र त्यो आगोको मुस्लोमा परिणत भएको देखिन्छ । दुर्घटनापछि विमानस्थलको उडान अवरुद्ध भएको छ । यहाँका सबै स्थानीय तथा अन्तर्राष्ट्रिय उडानहरु रद्द गरिएका छन् । जेजु एयर कोरियाको बजेट एयरलाइन्स हो । यो सन् २००५ मा स्थापना भएको थियो ।
