काठमाडौँ / बुधबार नेप्से परिसूचक २५.१६ अङ्कले घटेर २८२१.१३ बिन्दुमा झरेको छ । तीन दिनदेखि घटिरहेको बजारमा आज कारोबार रकम पनि घटेको छ । मङ्गलबार नेप्से घटेर २८४६.३० बिन्दुमा झरेको थियो ।
मङ्गलबार सेयर बजारमा आज १२ अर्ब ९४ करोड ६४ लाख ९३ हजार रुपैयाँ बराबरको कारोबार भएकोमा आज भने १० अर्ब ९७ करोड २६ लाख ५४ हजार रुपैयाँ बराबरको कारोबार भएको छ ।
बुधबार ६२ ओटा कम्पनीको सेयर मूल्य बढेको छ भने १७४ कम्पनीको घटेको छ । ८ कम्पनीको मूल्य आज स्थिर रह्यो ।
बुधबार ३०८ कम्पनीको २ करोड ३३ लाख ४३ हजार २०१ कित्ता सेयर १ लाख १६ हजार ३ पटकमा किनबेच भए । आज पुँजीकरण रकम पनि घटेर ४६ खर्ब ६८ अर्ब ४३ करोड रुपैयाँ कायम भएको छ ।
बुधबार कारोबारमा आएका व्यापारिक समूह बाहेक सेक्टरको परिसूचकमा घटेको छ । यस दिन व्यापारिक समूहको परिसूचक भने ०.४३ प्रतिशतले बढेको छ ।
जसमा सर्वाधिक बढी वित्त समूह १.५७ प्रतिशत, निर्जीबन बिमा १.५१ प्रतिशत, जीवन बिमा १.४८ प्रतिशत, लगानी समूह १.२४ प्रतिशत, विकास बैंक १.३१ प्रतिशत, बैंकिङ समूह १.०४ प्रतिशतले घटेको छ ।
यसैगरी, होटल तथा पर्यटन समूह ०.९३ प्रतिशत, उत्पादन तथा प्रशोधन समूह ०.९२ प्रतिशत, अन्य समूह ०.७६ प्रतिशत, लघुवित्त समूह ०.५० प्रतिशत र म्युचुअल फण्ड ०.१५ प्रतिशतले घट्यो ।
कारोबारमा आएदेखि सर्किट लेभलमा बढेको गार्डियन माइक्रो लाइफ इन्स्योरेन्सले आज पनि सो क्रमलाई निरन्तरता दिएको छ । प्रतिकित्ता १३८ रुपैयाँले मूल्य बढेर यो कम्पनीको सेयर मूल्य १५२०.२० रुपैयाँ कायम भएको छ ।
यसैगरी, समाज लघुवित्त वित्तीय संस्थाको सेयर मूल्यमा पनि सर्किट लागेको छ । प्रतिकित्ता २६९.८० रुपैयाँले बढेर यो कम्पनीको सेयर मूल्य २९६८ रुपैयाँ कायम भएको छ ।
यसैगरी, उन्नती सहकार्य लघुवित्त वित्तीय संस्थाको सेयर मूल्य ९.९५ प्रतिशत अर्थात १७४ रुपैयाँले बढेर १९२२ रुपैयाँ कायम भएको छ भने माउन्टेन हाइड्रो नेपाल लिमिटेडको सेयर मूल्य ८.८२ प्रतिशतले बढेर प्रतिकित्ता ३०४.९० रुपैयाँ कायम भएको छ ।
बुधबार ग्रीन डेभलपमेन्ट बैंकको लगानीकर्ताले सबैभन्दा बढी गुमाएका छन् । यो कम्पनीको सेयर मूल्य ६.८४ प्रतिशतले घटेर १३६० रुपैयाँ कायम भएको छ ।
यसैगरी, सप्तकोशी डेभलपमेन्ट बैंकको सेयर मूल्य ५.५१ प्रतिशतले घटेर प्रतिकित्ता १२ सय रुपैयाँ र उपकार लघुवित्त वित्तीय संस्थाको सेयर मूल्य ४.१० प्रतिशतले घटेर ४२१० रुपैयाँ कायम भएको छ ।
आजको कारोबार रकममा पनि हिमालयन रिइन्स्योरेन्सको हिस्सा सर्वाधिक बढी रहेको छ । कुल कारोबार रकममा यो कम्पनीको हिस्सा ९६ करोड ७० लाख ९५ हजार रुपैयाँ छ ।
त्यस्तै, दोस्रो स्थानमा रहेको नेपाल पुनर्बिमा कम्पनीको आज ९० करोड लाख ४८ हजार रुपैयाँ बराबरको सेयर कारोबार भएको छ ।
कारोबार बन्द हुने समयसम्म हिमालयनको सेयर मूल्य १११५ रुपैयाँ कायम भएको छ । मङ्गलबार ११२४.१० रुपैयाँ पुगेको यो कम्पनीको सेयर मूल्य आज घटेको हो ।
त्यस्तै, नेपाल पुनर्बीमाको १३४५ रुपैयाँ पुगेको छ । मङ्गलबार १३४१ रुपैयाँ रहेकोमा यो कम्पनीको मूल्य भने आज बढेको हो ।
