काठमाडौँ / चालु आर्थिक वर्ष २०८१/८२ को ८ महिना (साउन–फागुन)सम्ममा व्यापार घाटा ९ खर्ब ८७ अर्ब ३९ करोड रुपैयाँ पुगेको छ । जुन गत बर्षको तुलनामा ६.२२ प्रतिशतले बढेको हो । गत बर्ष यस अवधिमा मुलुकको व्यापार घाटा ९ खर्ब ८७ अर्ब ३९ करोड रुपैयाँ रहेको छ । 

फागुन मसान्तसम्म मुलुकको वैदेशिक व्यापार १५.२९ प्रतिशतले बढेको भन्सार विभागले जनाएको छ । चालु आवको ८ महिनामा १३ खर्ब ३७ अर्ब  ७४ करोड बराबरको वैदेशिक व्यापार भएको हो। गत वर्षको सोही अवधिमा यस्तो व्यापार ११ खर्ब ३० अर्ब ८४ करोड बराबरको भएको थियो । 

चालु वर्षको कुल व्यापारमध्ये ११ अर्ब ४५ अर्ब ५६ करोड बराबरको आयात भएको छ । जुन गत बर्षको तुलनामा ११ प्रतिशतले बढी हो । निर्यात पनि ५७ प्रतिशतले बृद्धि भएको विभागको तथ्याङ्क छ । गत बर्ष १ खर्ब ६१ लाख रुपैयाँ बराबरको वस्तु निर्यात भएकोमा यस बर्ष भने १ खर्ब ५८ अर्ब १७ करोड रुपैयाँ बराबरको निर्यात भएको हो । 

वैदेशिक व्यापार बढेसँगै राजस्व सङ्कलन पनि बढेको विभागले जनाएको छ । ८ महिनामा सरकारले वैदेशिक व्यापारबाट ३ खर्ब १ अर्ब ६० करोड रुपैयाँ राजस्व सङ्कलन गरेको हो । गत वर्षको सोही अवधिमा २ खर्ब ७० अर्ब ७८ करोड रुपैयाँ बराबर राजस्व सङ्कलन भएको विभागले जनाएको छ ।