काठमाडौँ / नेपाल माइक्रो इन्स्योरेन्स कम्पनी लिमिटेडले २२ लाख ५० हजार कित्ता साधारण सेयर (आइपिओ) जारी गर्ने भएको छ । कम्पनीले जारी पूँजीको ३० प्रतिशतले हुन आउने २२ करोड ५० लाख रुपैयाँ बराबरको आइपिओ प्रति सेयर अंकित मूल्य १०० रुपैयाँ दरमा सर्वसाधारणहरुमा निष्काशन गर्ने भएको हो ।
उक्त आइपिओ निष्काशन तथा बिक्री प्रबन्धकमा कम्पनीले एनआइएमबि एस क्यापिटल लिमिटेडलाई नियुक्त गरेको छ । न्यून आय भएका एवं पिछडिएका क्षेत्रका वासिन्दा र सिमान्तकृत समुदायका व्यक्तिहलाई लघु बीमा सेवा पु-याउने लक्ष्य लिएको नेपाल माइक्रो इन्स्योरेन्सले २०७९ चैत २७ मा निर्जीवन लघु बीमाको इजाजत पत्र प्राप्त गरेको हो ।
लघु निर्जीवन बीमा कम्पनीको हैसियतले २०८० बैशाख २६ गतेदेखि लघु निर्जीवन बीमा सम्बन्धी कारोबार सञ्चालन गर्दै आइरहेको छ । उक्त सम्झौतापत्रमा निष्काशन कम्पनीका तर्फबाट प्रमुख कार्यकारी अधिकृत मृगेन्द्रनाथ रिमाल र निष्काशन तथा बिक्री प्रबन्धकका तर्फबाट महाप्रबन्धक सचिन्द्र ढुङ्गानाले हस्ताक्षर गरे ।
