काठमाडौँ / दसैँको बिदाअघिको अन्तिम दिन पनि सेयर बजार सामान्य अंकले बढेको छ । नेपाल स्टक एक्सचेञ्ज (नेप्से)का अनुसार दसैँको घटास्थापना सुरु हुने अघिल्लो दिन नेप्से परिसूचक ४.८५ अङ्कले बढेर २ हजार ६ सय ६८.१७ बिन्दुमा उक्लिएको हो । 

ठूला कम्पनीको सेयर कारोबार मापन गर्ने सेन्सेटिभ परिसूचक ०.१३ अङ्कले बढेर ४८०.३६ मा उक्लिएको छ । 

कारोबार भएका १३ ओटा उपसमूहमध्ये आज तीन ओटा समूहको मात्रै सेयर मूल्यमा गिरावट आएको छ ।  यो दिन उत्पादन तथा प्रशोधन समूहको सेयर मूल्य १.०५ प्रतिशतले बढेको छ भने सबैभन्दा बढी व्यापार समूहको सेयर मूल्य ०.७८ प्रतितले घटेको छ । 
यो दिन विकास बैंक, इन्भेस्टमेन्ट, जीवन बिमा र व्यापार समूहबाहेक सबै समूहको सेयर मूल्य बढेका हुन् । 

नेप्से परिसूचक सामान्य अंकले बढे पनि आज कारोबार रकममा भने गिरावट आएको छ । मंगलबार ४ अर्ब रुपैयाँबढीको सेयर कारोबार भएकोमा आज सो रकम ३ अर्ब रुपैयाँमा सीमित भएको हो । 

कूल ८३ लाख १२ हजार ६८५ कित्ता सेयर ३ अर्ब ७६ करोड १५ लाख रुपैयाँ मूल्यमा खरिद–बिक्री भएको छ ।

नेप्सेका अनुसार, मिड युनाइटेड मोदी हाइड्रोपावर र सोलु हाइड्रोपावरको सेयर मूल्यमा १० प्रतिशतको पोजेटिभ सर्किट लागेको छ । 
त्यस्तै, उपर स्याङ्गे हाइडरोपावरको सेयर मूल्य ९.९३ प्रतिशत र राप्ती हाइड्रो एण्ड जनरल कन्स्ट्रक्सनको सेयर मूल्इ ९.६५ प्रतिशतले बढेको छ । 

यता, सार्वाधिक बढी गुमाउनेमा थ्री स्टार हाइड्रोपावरका लगानीकर्ताहरु छन् । यो कम्पनीको सेयर मूल्यमा नेगेटिभ सर्किट लागेको छ भने सिटिजन सपुर ३० म्युचुअल फण्डका लगातनीकर्ताले पनि ९.३६ प्रतिशतले गुमाएका छन् । 

बुधबार नेपाल फाइनान्सको  सेयर कारोबार सर्वाधिक बढी रहेको छ । आजको कारोबार रकममा यो कम्पनीको हिस्सा २२ करोड रुपैयाँभन्दा बढी रहेको छ । 

त्यस्तै, सानिमा बैंकको १८ करोड ९८ लाख रुपैयाँ र हिमालयन रिइन्स्योरेन्सको १५ करोड ७२ लाख रुपैयाँ रहेको छ ।